Бишкек, 27.04.26. /Кабар/. Талас шаарында аймактагы ишкердик чөйрөнү жандандырууга багытталган Talas Connect бизнес форуму өттү.
Президенттин облустагы өкүлчүлүгүнөн билдиришкендей, иш-чарага өлкөнүн ар кайсы аймактарынан 500гө жакын ишкер, банк өкүлдөрү жана жаш стартапчылар катышты.
Форумдун негизги максаты аймактагы туризмди, кайра иштетүү өнөр жайын жана өндүрүштү өнүктүрүү, инвесторлорго шарт түзүү болуп саналат.
Иш-чаранын жүрүшүндө мамлекеттик органдардын жана банктардын өкүлдөрү ишкерлерге салык, жеңилдетилген насыялар жана экспорттук мүмкүнчүлүктөр боюнча түз кеңеш беришти.
Облус башчысы Эрмат Жумаев жергиликтүү бийлик инвесторлорду колдоого даяр экенин билдирди. Ошондой эле белгилүү бизнес-насаатчы Анатолий Хуан катышуучуларга заманбап бизнес стратегиялары боюнча тренинг өттү.
Форумдун алкагында тажрыйба алмашуу сессиялары жана атайын көргөзмө уюштурулуп, жаңы өнөктөштүктөрдү түзүүгө жол ачылды. Катышуучулар Talas Connect аянтчасы аймактын экономикалык өсүшүнө жаңы дем берерин белгилешти.
Белгилей кетсек, форум президенттин Талас облусундагы өкүлчүлүгү жана Талас бизнес ассоциациясы тарабынан уюштурулду.
