Бишкек, 07.08.26. /Кабар/. Президенттин Талас облусундагы өкүлү Эрмат Жумаев облуска кире бериште ишке ашырылып жаткан бир катар инфраструктуралык долбоорлордун жүрүшү менен таанышты.
Өкүлдүн маалыматына караганда, учурда мынла туристтер жана коноктор үчүн заманбап "рест-поинт" курулууда. Анда жүргүнчүлөр үчүн ажаткана, кофекана, дүкөн жана электр унааларын кубаттоочу жай каралган.
Мындан тышкары, облуска кире бериштеги арка реконструкцияланып, Манастын айкели жаңыланып, айланасы жашылдандырылууда. Ошондой эле заманбап жарыктандыруу орнотулуп, эс алуучу отургучтар коюлууда.
Долбоордун алкагында Талды-Булак айылынан Өтмөк ашуусундагы облус чек арасына чейинки 36 чакырым жолго электр чубалгылары тартылып, жалпысынан 750 жарыктандыруу чырагы орнотулат. Бул жол кыймылынын коопсуздугун жогорулатууга, жол кырсыктарын алдын алууга жана аймактын инфраструктурасын жакшыртууга өбөлгө түзөрү белгиленди.
Эрмат Жумаев аткарылып жаткан иштердин негизги максаты – облус тургундары жана меймандар үчүн ыңгайлуу шарттарды түзүп, Таластын инфраструктурасын өнүктүрүү экенин белгиледи.
