Бишкек, 31.08.26. /Кабар/. Жогорку Кеңештин төрагасы Марлен Маматалиев Дүйнөлүк көчмөндөр оюндарынын расмий элчиси, сумо күрөшүнүн легендарлуу балбаны, 69-йокодзуна Хакухо Сё менен жолугушту.
Парламенттен билдиришкендей, жолугушууда Кыргызстанда сумо күрөшүн өнүктүрүү, спорт тармагындагы кызматташтыкты кеңейтүү жана тажрыйба алмашуу маселелери талкууланды.
Марлен Маматалиев Хакухо Сёнун дүйнөлүк спорттогу жетишкендиктерин жогору баалап, анын тажрыйбасы жаш спортчулар үчүн чоң үлгү экенин белгиледи.
Ошондой эле анын Дүйнөлүк көчмөндөр оюндарынын расмий элчиси болушу оюндарды дүйнөгө таанытууга жана көчмөн маданиятын жайылтууга өбөлгө түзөрүн айтты.
Өз кезегинде Хакухо Сё сумо тармагында 20 жылдан ашык эмгектенгенин, анын 14 жылын ёкодзуна макамында өткөргөнүн белгилеп, топтогон билимин жана тажрыйбасын дүйнө жүзүндөгү спортчулар менен бөлүшүүгө даяр экенин билдирди.
