Кыргызстанда 1-ноябрь - Милиция кызматкерлеринин күнү белгиленет. Майрамды утурлай "Кабар" агенттиги Ысык-Көл облусунун Ак-Суу райондук ички иштер бөлүмүнүн тергөөчүсү, милициянын ага лейтенанты Кымбат Нуржанова менен маек курду. Жаш, бирок тажрыйбалуу милиция кызматкери, ал өзүнүн кызматына гана берилбестен, таяк тартыш боюнча дүйнөнүн эки жолку чемпиону болуу менен Кыргызстанга эл аралык даңк алып келген. Маекте Кымбат бала кездеги кыялы, кесибинин кыйынчылыктары, кызматтык спорт менен профессионалдык спортту кантип айкалыштыруу керектигин айтып берди.
— Кымбат айым, кесиптик майрамыңыз менен куттуктайм! Өзүңүз жөнүндө кыскача айтып берсеңиз.
— Чоң рахмат. Учурда Ысык-Көл облусунун Ак-Суу районунда тергөөчү кызматын аркалап, милициянын улук лейтенанты наамынын ээсимин.
— Милицияга кантип келип калдыңыз? Бул балалык кыялбы же убакыттын өтүшү менен кабыл алынган чечимби?
— Мен милиция кызматкери болууну бала кезден кыялданчумун. Мектепте, болжол менен 7-класстан тарта, милиционер болом деп чечим кабыл алгам. Форма кийип, элге кызмат кылууну каалагам. Башында аскер кызматкери болууну кыялдангам, бирок тагдыр мени ички иштер органдарына алып келди. Максатыма жетүү үчүн бардык күчүмдү жумшап, генерал-майор Э. Алиев атындагы ИИМ Академиясына тапшырып, аны 2022-жылы аяктадым. Академияны бүткөн соң Каракол шаарында тергөөчү болуп иштей баштадым, ал жерде жарым жылдай иштеп, андан кийин Ак-Суу районуна которулдум.
— Сиз мас-рестлинг боюнча дүйнө чемпионусуз. Бул салыштырмалуу сейрек кездешүүчү жана күчтүү спортко кантип аралашып калдыңыз?
— Мен дайыма айтып келем - спортко милиция кесиби үчүн келгем. Ага чейин бий менен алектенчүмүн. Бирок ИИМ Академиясына бюджеттик негизде тапшыруу үчүн спорттук жетишкендиктер болушу керек эле. Ошондо таяк тартышта өзүмдү сынап көрүүнү чечтим. Караколдо мектеп окуучулары арасында мелдеш өтүп жаткан, мен да катыштым. Алгач бул спорт жеңил көрүнгөн, бирок эртеси күнү төшөктөн араң турдум. Ошентип менин спорттогу жолум башталды. Жети-сегиз жылдай машыгып жүрдүм. Азыр мен таяк тартыш боюнча Кыргыз Республикасынын эмгек сиңирген спорт чебери, эки жолку дүйнө чемпиону, дүйнө кубогунун ээси, Азиянын жана Кыргызстандын көп жолку чемпионумун. Бул спорт түрүндө азырынча эмгек сиңирген спорт чебери деген наамга ээ болгон жападан жалгыз спортчумун.
— Кызмат менен спортту мынчалык жогорку деңгээлде айкалыштырууга кантип жетишип жатасыз?
— Бул чындыгында эле оңой эмес. Бирок милицияда спорт менен алектенгендерге ар дайым колдоо көрсөтүлөт. Академияда окуп жүргөндө мага түшүнүү менен мамиле кылышып, машыгууларга кетүүгө уруксат беришчү, сабактарды кууп жетүүгө да жардам беришкен. Азыр кызматта да мелдештерге катышуу үчүн арыз жазып, уруксат алууга мүмкүнчүлүк бар. Азыр, албетте, бир аз кыйыныраак болуп калды, анткени тергөөчүнүн иши моралдык да, физикалык да жактан толук берилгендикти талап кылат. Биз эркектер менен теңтайлашып иштейбиз, бул кесипте аял-эркек деген түшүнүк жок. Кээде кыйын, кооптуу жагдайлар да болуп турат, бирок алардын баарынан ийгиликтүү чыгабыз.
—Эмне кыйыныраак? Атаандашты жеңүүбү же жумуштагы кыйынчылыктар менен күрөшүүбү?
—Чындыгында, мелдеште атаандашымды жеңүү жеңилирээк. Ал жакта баары түшүнүктүү чыктың, күчүңдү көрсөттүң, жеңдиң. Ал эми кызматта ар кандай чакыруулар болот: мас абалындагы чыр-чатактар, жаңжалдар, оор кылмыш иштер. Мындай учурда сүйлөшө билүү, ынандыруу, сабырдуулукту сактоо керек болот. Бул болсо көпкө чейин эмоционалдык чыдамкайлыкты талап кылат.
— Мыкты милиция кызматкери менен ийгиликтүү спортчуну кандай сапаттар бириктирет деп ойлойсуз?
— Биринчи кезекте тартип. Дагы бир маанилүү сапат - мыйзам чегинде иш кыла билүү. Милиция кызматкери жарандардан ошону талап кылууга моралдык укугу болушу үчүн мыйзамды өзү сакташы керек.
— Спорттук карьераңызды улантууну пландап жатасызбы же кызматыңызга басым жасоону чечтиңизби?
— Учурда мен спорттук карьерамды аяктадым. Спортто жетем деген максаттарыма жеттим. Тилекке каршы, бул таяк тартыш Олимпиадалык спорттун түрү эмес жана башка тармактардай колдоо албайт. Балким, шарттар башкача болгондо, мен дагы деле катышууну улантмакмын. Азыр мен көбүнчө мелдештерге калыс катары катышып, ишиме көбүрөөк көңүл буруудамын. Ошондой эле көпчүлүк аялдар сыяктуу эле, үй-бүлө курууну каалайм, анткени үй-бүлө биринчи орунда турушу керек деп эсептейм.
— Милиция же спорт тармагында карьера кылууну кыялданган кыздарга эмне айтмакчы элеңиз?
— Милицияда иштөөнү каалаган кыздарга кеңешим бул кадамды жакшылап ойлонуп чыгышсын. Бул олуттуу чечим жана чоң жоопкерчилик, анткени сен өзүң үчүн гана эмес, башкалар үчүн да жооп бересиң. Ал эми спортко баргысы келгендерге айтаарым, чоң спорт бул ден соолук үчүн эмес. Ден соолук үчүн бул жөн гана дене тарбия. Чоң спорт курмандыкты талап кылат. Эң негизгиси адам өзү сүйгөн ишти тандоосу керек, ошондо гана аны ырахат менен аткарат. “Керек болгондуктан” эмес, чын дили менен жасаган иш ийгиликке жеткирет.
— Милиция кесиби сиз үчүн эмне?
— Мен үчүн милиция бул чоң үй-бүлө. Бул жерде улуулар да, жаштар да, эркектер менен аялдар да, тажрыйбалуу устаттар жана жаш кызматкерлер бар. Биз бири-бирибизди колдойбуз, тажрыйба бөлүшөбүз, кеңеш айтабыз. Ушундай үй-бүлөнүн бир бөлүгү болуу мен үчүн чоң сыймык. Өз элиме кызмат кылуу - бул мен үчүн чоң ардак.
