Бишкек, 11.03.26. /Кабар/. Министрлер кабинетинин төрагасы Адылбек Касымалиев Бишкек шаарындагы Республикалык соттук-медициналык экспертиза борборуна (РСМЭБ) барды.
Иш сапарынын жүрүшүндө эксперттердин иш шарттары, лабораториялардын жана мекеменин инфраструктурасынын абалы менен кеңири таанышып, борбордун имаратынын абалына өзгөчө көңүл бурду.
Минкаб төрагасы корпусту карап чыгып, имараттын моралдык жана техникалык жактан эскиргенин белгиледи.
"Ондогон жылдар бою капиталдык оңдоодон өткөн эмес жана канааттандырарлык эмес абалда", - деди ал.
Иш сапардын жыйынтыгында кыска мөөнөттө жаңы имараттын долбоорун иштеп чыгууну жана заманбап ярустук муздаткыч түзүлмөлөрдөн баштап ДНК-тесттөө үчүн лабораториялык комплекстерге чейин жабдуулардын тизмесин түзүүнү тапшырды. Долбоорго каржылык эсептөөлөр жана биринчи кезектеги жана келечектүү этаптарга бөлүнгөн иш графиги тиркелиши керек.
