Бишкек, 27.01.25. /Кабар/. Мамлекеттик салык кызматынын төрагасы Алмамбет Шыкмаматов Кыргызстандагы коммерциялык банктардын өкүлдөрү менен жолугушуу өткөрдү.
Ведомстводон маалымлашкандай, жолугушууда талкуунун негизги темасы бизнес жүргүзүүгө ыңгайлуу шарттарды түзүү үчүн Салык кызматы менен банк секторлорунун ортосундагы өз ара аракеттенүүнү жакшыртуу болду.
Жолугушуунун алкагында банктардын өкүлдөрү Салык кызматынын электрондук кызматтарын пайдалануу мүмкүнчүлүгүн алууга кызыкдар экендигин билдиришти. Алардын пикири боюнча бул, ишкерлерди колдоо жана алардын салык органдары менен өз ара аракеттенүүсүн жөнөкөйлөтүү үчүн жаңы мүмкүнчүлүктөрдү ачат.
Өз кезегинде Шыкмаматов салыктык башкаруунун натыйжалуулугун жогорулатуунун жана бизнес үчүн жол-жоболорду жөнөкөйлөштүрүүнүн маанилүүлүгүн белгиледи. Салык кызматынын башчысы белгилегендей, коммерциялык банктар менен өнөктөштүк мамилелерди өнүктүрүү ыңгайлуу салык чөйрөсүн түзүү жолундагы маанилүү кадам болуп саналат.
Жолугушуунун жыйынтыгында Шыкмаматов Салык кызматы менен коммерциялык банктардын ортосундагы кызматташтыкты кеңейтүү боюнча демилгелерди ишке ашырууга мүмкүндүк бере турган ченемдик-укуктук актыларга өзгөртүүлөрдү киргизүү мүмкүнчүлүгүн карап чыгууну тапшырды.
Тараптар ишкердик субъекттери үчүн салык жол-жоболорунун ачыктыгын жана жеткиликтүүлүгүн жогорулатууга багытталган, биргелешкен долбоорлордун үстүндө иштөөнү улантууну макулдашышты.
