Бишкек, 11.06.26. /Кабар/. Нарын шаарында жаан-чачындан кийинки сел коркунучун алдын алуу жана коопсуздукту чыңдоо иштери кызуу жүрүүдө.
Шаардык мэриядан билдиришкендей, Матен Сыдыков чөлкөмүндө жаан сууларын коопсуз алып өтүүчү 260 метрлик канал казылды.
Ошондой эле учурда Чыргайлуу көчөсүнүн жээгине сел агымдарын багыттоочу арыктардын нугу салынып, Бейшеналиева көчөсүндө сел тосмосун курууга даярдыктар башталды.
Мындан тышкары, шаардын коопсуздугун жогорулатуу программасынын алкагында быйыл РТС чөлкөмүндөгү Жетиген, Ак Коргондогу Чоң-Чыргайлуу, Атакан жана Бейшеналиев көчөсүндөгү Суу сактагыч коктуларына таш менен толтурулган атайын тор тосмолор курулат.
