Бишкек, 21.01.26. /Кабар/. Жылдын суук мезгилинде жана курч респиратордук вирустук инфекциялар менен сасык тумоо күчөгөн учурда иммунитетти – организмдин вирустардан, бактериялардан жана башка инфекциялардан коргоочу табигый тутумун колдоо өзгөчө маанилүү. Бул боюнча Бишкек ден соолукту чыңдоо борборунун дарыгерлери сунуштарын беришти.
Адистер белгилегендей, иммунитет — бул физикалык абал эле эмес, бүтүндөй организмдин бирдиктүү тутум катары иштешинин натыйжасы. Эмоционалдык абалы, жашоо образы, тамактануу жана атүгүл баарлашуунун сапаты ооруларга туруктуулукка түздөн-түз таасир этет.
Медиктер биринчи кезекте стрессти азайтууну кеңеш кылышат. Өнөкөт чарчоо — физикалык да, акыл-эс жагынан да организмди алсыратып, иммундук коргонууну начарлатат. Социалдык байланыштар дагы маанилүү. Изилдөөлөр көрсөткөндөй, жылуу жана туруктуу баарлашууда болгон адамдар сейрек оорушат жана кыйынчылыктарды жеңил көтөрүшөт.
Ошондой эле дарыгерлер позитивдүү ой жүгүртүүнү өстүрүүнү сунушташат. Оптимизм эмоционалдык жана физикалык жүктөмдөрдү натыйжалуу көтөрүүгө жардам берет. Тамактануу да чоң ролду ойнойт: ар түрдүү түстөгү жашылча-жемиштерден турган рацион ичегинин саламаттыгын колдойт, ал эми иммунитет көп жагынан дал ушул ичегиден көз каранды.
Кыш мезгилинде организмге витаминдер жана микроэлементтер жетишпеши мүмкүн, ошондуктан кошумча каражаттарды ичүүгө болот, бирок аны дарыгер менен кеңешкенден кийин гана жасоо зарыл. Мындан тышкары, адистер такай кыймылда болууну сунушташат, анткени физикалык активдүүлүк жүрөктү, кан тамырларды чыңдап, көптөгөн оорулардын алдын алат.
Медиктер уйкунун канышына өзгөчө көңүл бурушат. Уйкунун жетишсиздиги иммунитеттин башкы душмандарынын бири деп эсептелет, ал эми жетиштүү уйку организмдин калыбына келишине жана инфекциялардан натыйжалуу коргонуусуна жардам берет.
Дарыгерлер баса белгилегендей, иммунитетке кам көрүү күнүмдүк адатка айланышы керек, анткени бул ден соолукка жасалган эң ишенимдүү инвестициялардын бири.
