Бишкек, 09.07.26. /Кабар/. Бишкекте "Кыргызстандагы ишкердик чөйрө, санариптештирүү жана жасалма интеллектти киргизүү: жеке сектордун көз карашы" аттуу Экономикалык кызматташтык жана өнүгүү уюмунун (OECD) алдын ала изилдөө жыйынтыктары тааныштырылды.
Экономика жана коммерция министрлигинен билдиришкендей, иш-чара Европа биримдигинин колдоосу менен уюштурулду.
Анда министрдин биринчи орун басары Чоро Сейитов өлкөдө жагымдуу ишкердик чөйрөнү өнүктүрүү, санариптик трансформация жана жасалма интеллект сыяктуу инновациялык технологияларды жайылтуу мамлекеттик саясаттын артыкчылыктуу багыттары экенин белгиледи.
Семинарда жеке сектордо санариптештирүүнүн деңгээли жана жасалма интеллект технологияларын колдонуу боюнча жүргүзүлгөн изилдөөнүн жыйынтыктары сунушталды.
Ошондой эле ченемдик-укуктук базаны өркүндөтүү жана чакан, орто бизнести колдоо маселелери талкууланып, мамлекет, бизнес жана эл аралык өнөктөштөрдүн ортосундагы кызматташтыкты кеңейтүү жолдору каралды.
Жолугушуунун жыйынтыгында OECD уюмунун бул изилдөөсү Кыргызстанда ишкердикти колдоо жана экономиканы санариптик трансформациялоо боюнча мамлекеттик саясатты мындан ары өркүндөтүүгө бекем негиз болору баса белгиленди.
