Бишкек, 28.05.26. /Кабар/. "Манас" улуттук академиясында Кыргыз Республикасынын Эл сүрөтчүсү Жоомарт Кадыралиевдин 80 жылдыгына арналган эскерүү кечеси өттү.
Академиядан билдиришкендей, иш-чарада “Жоомарт жолу – “Манас” аттуу сүрөт-китебинин бет ачары болуп, сүрөтчүнүн улуу эпоско арналган эмгектери коомчулукка сунушталды. Ошондой эле заманбап технология менен айкалышкан “Көктүн уулу” аттуу иммерсивдик санарип музейинин ачылышы өзгөчө таасир калтырды.
Эскерүү кечесинде сөз сүйлөгөндөр кыл калем чеберинин чыгармачылык мурасы кыргыз маданиятынын алтын казынасында өзгөчө орун ээлерин, ал эми анын ар бир эмгеги эпостун духун сүйлөткөн баалуу казына экенин белгилешти.
Иш-чарага мамлекеттик кызматкерлер, көрүнүктүү маданият жана коомдук ишмерлер, сүрөтчүлөр, студенттер, ошондой эле залкардын жакындары катышып, анын өнөр жолу тууралуу жылуу эскерүүлөрү менен бөлүшүштү.
Алардын катарында төмөнкүлөр бар:
- Октябрь Капалбаев — президенттин администрациясынын бөлүм башчысы;
- Назира Аалы кызы — "Манас" улуттук академиясынын президенти;
- Түгөлбай Казаков — КР Эл артисти;
- Осмонакун Ибраимов — коомдук жана мамлекеттик ишмер, академик;
- Асан Жакшылыков, Кайрат Иманалиев — КР Эл жазуучулары;
- Меңди Мамазаирова — КР Эл акыны;
- Асан Турсункулов — КР Эл сүрөтчүсү;
- Жакшыбек Жунушев — Сүрөтчүлөр союзунун төрагасы;
- Жаңыл Төлбашиева — С. А. Чуйков атындагы Кыргыз мамлекеттик көркөм сүрөт окуу жайынын өкүлү;
- Элдар Аттокуров — А. Осмонов атындагы Улуттук китепкананын директору;
- Эркайым Кадыралиева — Жоомарт Кадыралиевдин жубайы.
"Көктүн уулу" иммерсивдик санарип музейин виртуалдык форматта көрүүгө болот. Төмөнкү шилтеме аркылуу өтүңүз: «Көктүн уулу» санариптик көргөзмөсү
