Бишкек, 08.10.25. /Кабар/. Мамлекеттик салык кызматы Кыргыз-Түрк "Манас" университетинин "Экономика", "Финансы жана кредит" жана "Менеджмент" багытындагы биринчи курстун студенттери үчүн ачык эшиктер күнүн өткөрдү.
Ведомстводон маалымдашкандай, эки күндүн ичинде 80ден ашык студенттер салык органдарынын иши менен ичинен таанышып, адистерге суроолорун берип, андан аркы практика өтүү жана ишке орношуу мүмкүнчүлүктөрү боюнча маалымат алышты.
Жолугушуунун жүрүшүндө катышуучулар Салык кызматынын негизги функциялары жана түзүмү, электрондук сервистердин (анын ичинде "Салык төлөөчүнүн кабинети", электрондук салык отчеттуулугу ж.б.) ишин көрсөтүү менен практикалык сабактар, салыктык башкаруу боюнча реалдуу кейстер менен таанышышты.
Мындан тышкары, Салык кызматынын өкүлдөрү карьералык мүмкүнчүлүктөр, конкурстар жана стажировкалар тууралуу маалымат беришти.
Ошондой эле студенттерге Бишкек шаарынын Ишкерлерди тейлөө борборунда экскурсия өткөрүлдү.
Белгилей кетсек, бул иш-чара кесиптик багыт берүү жана өлкөнүн билим берүү мекемелери менен ачык өз ара аракеттенүү программасынын алкагында өттү.
