Бишкек, 06.08.25. /Кабар/. Саламаттык сактоо министри Эркин Чечейбаев жумушчу сапары менен Нарын облусунда жүрөт.
Ведомстводон маалымдашкандай, министр сапарынын алкагында Нарын облустук бириктирилген ооруканасына, облустук үй-бүлөлүк медицина борборуна, ошондой эле курулуш стадиясында турган саламаттык сактоо объектилерине барды.
Сапардын негизги максаты — аймактагы саламаттык сактоо мекемелеринин учурдагы абалын талдоо, көрсөткүчтөрдү изилдөө жана тармактагы артыкчылыктуу милдеттерди талкуулоо болду.
Облустук оорукананын директору Муратбек Аляскаровдун айтымында, учурда стационарда 503 керебет бар. 2025-жылдын алты айында стационарда 10 328 бейтап дарыланган.
Гемодиализ бөлүмүндө ушул жарым жылдыкта 130 бейтап дарыланып, 1 147 диализ сеансы жүргүзүлгөн, ал эми компьютердик томография бөлүмүндө 1 266 изилдөө жүргүзүлдү.
Ошол эле учурда чечүүнү талап кылган курч маселелер дагы бар. Атап айтканда, гемодиализ жана реанимация бөлүмдөрүндө медициналык жабдуулардын жетишсиздиги, ошондой эле дарыгерлердин тартыштыгы. 2025-жылдын август айына карата жалпы Нарын областы боюнча 141 дарыгер жетишпейт, анын ичинен 23ү — областтык оорукананын муктаждыгы. Адистерди тартуу максатында социалдык колдоо чаралары, анын ичинде үй-бүлөлүк дарыгерлерди турак жай менен камсыздоо маселеси каралууда.
Министр саламаттык сактоо уюмдарындагы Сапат бөлүмдөрүнүн эффективдүү ишин өзгөчө белгилеп, Нарын облустук ооруканасы бул багытта республика боюнча лидерликти көрсөтүп жатканын айтты.
Сапардын алкагында министр курулуш жана инфраструктуралык долбоорлордун жүрүшүнө да өзгөчө көңүл бурду. Ал Нарын облустук соттук-медициналык экспертиза бюросунун моргунун жаңы имаратынын курулушу менен таанышып, бул объектке бюджеттен 15,5 млн сом каралганын белгиледи. Имарат зарыл болгон жабдуулар менен да камсыздалмакчы.
Мындан сырткары, быйыл 100 орундуу төрөт бөлүмүнүн, Нарын шаарындагы ОҮМБнын жаңы имаратынын жана №5 Үй-бүлөлүк дарыгерлер тобунун имаратынын курулушу башталары белгиленди.
