Бишкек, 03.12.25. /Кабар/. Ак-Талаа районуна сафлор майын чыпкалоочу ишканага Түркия мамлекетинен жаңы өндүрүштүк жабдуулар алып келинди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, жабдуулар БУУнун Өнүктүрүү программасынын долбоорунун каржылоосу менен алынды.
Жеке ишкер Акылбек Абдылдаевдин айтымында, жаңы линиянын мүмкүнчүлүгү суткасына 800 кг сафлор майын сыгууга жетет. Учурда жабдуулар орнотулуп, ишкана жакынкы күндөрү толук кандуу иштей баштайт.
Буга чейин ишкана кардарлардын суранычы боюнча күнүнө болгону 50 литрге чейин май чыгарып келген. 2023-жылдын күз мезгилинен бери иштеп келе жаткан ишкана өткөн жылы 5 тонна, быйыл болсо 10 тоннадан ашык сафлор уругун кайра иштеткен.
Учурда сафлор майынын 1 литри 200 сомдон сатылууда.
Жаңы жабдуулардын орнотулушу район аймагында кайра иштетүү тармагын өнүктүрүүгө, жаңы мүмкүнчүлүктөрдү түзүүгө жана жергиликтүү өндүрүүчүлөрдү колдоого багытталган.
