Бишкек, 07.11.26./Кабар/. Президент Садыр Жапаров бүгүн, 7-ноябрда Чүй облусуна болгон иш сапарынын жүрүшүндө Токмок шаарынын, Чүй жана Кемин райондорунун тургундары менен жолугушту.
Жолугушуунун жүрүшүндө жашоочулар президентке жеке мүнөздөгү маселелер менен катар мамлекеттик жана жергиликтүү деңгээлде чечүүнү талап кылган көйгөйлөр боюнча да кайрылышты.
Атап айтканда, реабилитациялык борборлорду, билим берүү мекемелерин куруу, фермерлерге айыл чарба насыяларын жеңилдетилген шарттарда жана төмөн пайыздык чендер менен алуу мүмкүнчүлүгүн берүү маселелери көтөрүлдү.
Ошондой эле тургундар автомобиль жолдорунун абалын жакшыртуу, калкты таза ичүүчү суу менен камсыз кылуу зарылдыгын белгилешти, мындан тышкары жер тилкелерин бөлүп берүү маселелерин жана мунапыс менен кечирим берүүгө байланышкан кайрылууларын билдиришти.
Бардык маселелерди угуп чыгып, президент Садыр Жапаров келип түшкөн кайрылууларды өз убагында жана объективдүү кароонун маанилүүлүгүн белгиледи. Ошондой эле ал тургундарды кыраакы болууга, алдамчылардын айла-амалдарына алданбоого жана жер тилкелерин, кыймылсыз мүлк объектилерин сатып алуу-сатуу боюнча бүтүмдөрдү жасоодо алдамчылык фактыларына жана андан кийинки мүлктүк талаштарга жол бербөө үчүн документтердин юридикалык жактан таза экендигин кылдат текшерүүгө чакырды.
