Бишкек, 19.10.26. /Кабар/ Күн мурун Раззаков шаарында самбо күрөшү боюнча эл аралык класстагы спорт чебери, дүйнө чемпионатынын коло жана Азия чемпионатынын күмүш медалынын ээси Айбек Разыковдун байгесине арналган республикалык мелдеш болуп өттү.
Президенттин Баткен облусундагы өкүлчүлүгүнөн билдиришкендей, мелдешке республиканын ар кайсы аймактарынан келген 120дан ашуун 2008-2014-жылы туулган жаш спортчулар катышып, ар түрдүү салмак категориялары боюнча күч сынашты.
Спорттук иш-чара Баткен облустук дене тарбия жана спорт башкармалыгы жана Лейлек райондук балдар-өспүрүмдөр спорт мектеби тарабынан уюштурулду.
Мелдештин негизги максаты — самбо күрөшүн жаштар арасында кеңири жайылтуу, өспүрүмдөрдү спортко тартуу, алардын спорттук чеберчилигин жогорулатуу жана сергек жашоо образын калыптандыруу.
Аталган спорттук иш-чарага облус башчыссынын орун басары Максатай Каримбердиева баштаган жетекчилер катышты.
Алар мелдештин катышуучуларына жылуу каалоо-тилектерин билдирип, жаш спортчуларды спорт менен үзгүлтүксүз машыгууга, алдыга максат коюп, бийик ийгиликтерге жетүүгө үндөштү. Ошондой эле спортту өнүктүрүү, жаштардын спорттук мүмкүнчүлүктөрүн кеңейтүү жана келечектеги чемпиондорду тарбиялоо багытындагы иштердин маанилүүлүгү белгиленди.
Мелдештин жыйынтыгында өз салмак категорияларында мыкты көрсөткүчтөрдү жаратып, байгелүү орундарга ээ болгон жаш спортчулар уюштуруучулар тарабынан сыйлыктар менен сыйланышты.
