Бишкек, 05.10.25. /Кабар/. Президент Садыр Жапаров бүгүн, 5-октябрда Ош облусуна болгон жумушчу сапарынын жүрүшүндө Ош шаарында Барпы Алыкулов атындагы жаңы парктын ачылыш аземине катышты.
Мамлекет башчысы иш-чаранын башында символикалык түрдө боону чечти. Андан соң ал аймактын көрктөндүрүлүшү жана шаар тургундары менен меймандары үчүн эс алуу жана активдүү убакыт өткөрүүгө түзүлгөн шарттар менен таанышты.
Ак-Буура дарыясынын боюнда жайгашкан парктын жалпы аянты 26 000 чарчы метрди түзөт. Паркты куруу иштери 2025-жылдын июнь айында башталып, бүгүнкү күндө толугу менен аяктады.
Белгилей кетсек, бул аймак жакшыртууга чейин кароосуз калган абалда болгон. Азыр паркта воркаут-зона, балдардын оюн аянтчасы, унаа токтотуучу жай, мини-футбол талаасы жана башка шарттар түзүлгөн.
Соңунда президент Садыр Жапаров жергиликтүү тургундар менен баарлашып, алар анын аймакка көңүл буруусу, демилгелерди колдогону жана маанилүү социалдык жана инфраструктуралык долбоорлорду ишке ашырганы үчүн ыраазычылык билдиришти.
Президенттин басма сөз кызматы
