Бишкек, 23.04.26. /Кабар/. Саламаттык сактоо министри Дамир Осмонов Астана шаарында өткөн Регионалдык экологиялык саммиттин ишине катышты. Бул тууралуу ведомстводон билдиришти.
Анын алкагында Дүйнөлүк саламаттык сактоо уюму жана Борбор Азия, Азербайжан, Грузиянын тармактык министрлеринин катышуусунда балдардын ден соолугун коргоого багытталган жогорку деңгээлдеги конференция өттү.
Министр Дамир Осмонов панелдик сессияда сөз сүйлөп, Кыргызстандын экология жана калктын ден соолугу боюнча позициясын тааныштырды. Ал климаттын өзгөрүшү жана мөңгүлөрдүн эриши тоолуу аймактардагы медициналык жардамдын жеткиликтүүлүгүнө түздөн-түз таасир этерин белгиледи.
"Биз үчүн тоолуу шарттарда калкка туруктуу медициналык жардам көрсөтүү тутумун түзүү - артыкчылыктуу багыт. Бул үчүн санариптик чечимдерди, мобилдик медициналык кызматтарды жана өзгөчө кырдаалдарга ыкчам жооп кайтаруу механизмдерин жигердүү өнүктүрүп жатабыз", - деди министр.
Ошондой эле ал тоолуу аймактардагы экологиялык көйгөйлөр Арал жана Каспий бассейндеринин абалына окшош экенин, анткени тоолордогу өзгөрүүлөр бүтүндөй региондун суу ресурстарына таасир берерин кошумчалады.
Министр Кыргызстан келечек муундардын кызыкчылыгы үчүн ДССУ жана регионалдык өнөктөштөр менен экологиялык күн тартибинде ден соолук маселелерин илгерилетүү боюнча кызматташууга даяр экенин ырастады.
Жыйындын жыйынтыгында катышуучулар "Астана чакырыгы" аттуу биргелешкен документти кабыл алышты. Бул документ төмөнкү багыттарды чыңдоону көздөйт:
- балдардын жана өспүрүмдөрдүн саламаттыгын коргоо системасын жакшыртуу;
- баштапкы медициналык-санитардык жардамды жана эмдөөнү өнүктүрүү;
- психикалык ден соолукту коргоо жана оорулардын алдын алуу.
