Бишкек, 30.07.26 /Кабар/. Ош шаарынын Ишкаван айылында 700 окуучуга ылайыкталган жаңы мектеп курулууда.
Курулуш министрлигинен билдиришкендей, объекттин курулушу республикалык бюджеттин эсебинен каржыланып, иштер үстүбүздөгү жылдын февраль айында башталган.
Учурда курулуш-монтаждоо иштери комплекстүү жүргүзүлүүдө. Имараттын негизги каркасы тургузулуп, ички шыбак иштери аткарылып, чатырын жабууга даярдык көрүлүүдө.
Долбоорго ылайык, имараттын жалпы аянты 5 613 чарчы метрди түзүп, үч кабаттан турат. Мектеп заманбап талаптарга ылайык курулуп, мүмкүнчүлүгү чектелген балдар үчүн да бардык шарттар каралат.
Анда 700 окуучуга ылайыкталган окуу класстары, лабораториялар, санитардык талаптарга жооп берген ашкана, китепкана, 300 көрүүчүгө ылайыкталган амфитеатр тибиндеги актовый зал, лифт жана 120 көрүүчүгө ылайыкталган бардык шарты бар спорт залы жайгашат.
Учурда объекттин курулушунун жалпы даярдыгы 45 пайызды түзөт.
Мектеп пайдаланууга берилгенден кийин 1,5 миңге жакын окуучунун билим алуусуна шарт түзүлөт.
