Бишкек, 23.05.25. /Кабар/. Бүгүн саламаттык сактоо министри Эркин Чечебаев Ош облустук кургак учукка каршы күрөшүү борборунун жаңы диагностикалык бөлүмүнүн курулушу үчүн мезгил кутусун салды.
Ведомстводон билдиришкендей, сапардын алкагында министр борбордун жамааты менен жолугушуп, учурдагы маселелерди талкуулап, кызматкерлердин суроолоруна жооп берди. Ал саламаттык сактоо системасын өнүктүрүү өлкө жетекчилигинин, атап айтканда президент Садыр Жапаровдун артыкчылыктуу багыты экенин белгиледи. "Ушул колдоонун аркасында Кыргызстанда ай сайын жаңы медициналык объектилер ачылууда. Мисалы, 22-май күнү Өзгөн районунун Мырза-Аке айылында заманбап оорукананын ачылышы болду", — деди министр.
Эркин Чечебаевдин айтымында, тармактагы негизги көйгөйлөрдүн бири — медицина кызматкерлеринин айлык маянасынын бирдей эмес болушу. Ал учурда медициналык кызматкерлердин, анын ичинде башкаруу, кенже жана техникалык тейлөөчү персоналдын эмгек акысын көтөрүү боюнча иштер жүрүп жатканын маалымдады. Бул иштер 2025-жылдын ичинде жүргүзүлөт.
Мындан сырткары, министр жыл башында өрттөн жабыркаган борбордун административдик имаратын көрүп чыкты. Анын ордуна жаңы имарат куруу пландалууда. Ошондой эле Эркин Чечебаев кабыл алуу жана диагностикалык бөлүмдөрдүн курулушунун пайдубалына мезгил кутусун салып, бул иштерди 2025-жылдын аягына чейин бүтүрүү пландалып жатканын билдирди. Мындан сырткары, хирургия бөлүмүн да кыдырып, анын абалы жана кызматкерлердин иш шарты менен таанышты.
Эркин Чечебаев борбордун жетекчилигинин жана жамаатынын өз иш багытындагы аракеттерин жогору баалады.
Сапардын жыйынтыгында министр борбордо айтылган маселелерди терең иликтөөнү тапшырды.
