Бишкек, 27.07.25. /Кабар/. Кыргыз мамлекеттүүлүгүн түптөөгө жана өнүктүрүүгө зор салым кошкон мамлекеттик ишмер Алымбек датка Асан бий уулунун 225 жылдык мааракеси министрлер кабинетинин тескемесине ылайык улуттук деңгээлде өткөрүлүп баштады.
Президенттин Ош облусундагы өкүлчүлүгүнөн билдиришкендей, мааракелик иш-чаралар күн мурун Чоң-Алай районундагы Ленин чокусуна жакын жайгашкан альпинисттик лагерде туристтик фестивалдын ачылышы менен башталды.
Иш-чарага президенттин өкүлүнүн орун басары Илияз Ташбаев, Жогорку Кеңештин депутаттары, Алымбек датканын урпактары, жергиликтүү бийлик өкүлдөрү, кол өнөрчүлөр, альпинисттер, туристтер жана жергиликтүү тургундар катышты.
Илияз Ташбаев өз сөзүндө конокторду жана жергиликтүүлөрдү бул мааракелик салтанат менен Ош облусунун башчысы Элчибек Жантаевдин жана өзүнүн атынан куттуктап, Алымбек датканын кыргыз мамлекеттүүлүгүн түптөө максатында жасаган кадамдарына, элдин ынтымагын бекемдөө багытындагы зор эмгектерине кеңири токтолуп өттү.
Алымбек датка — кыргыз мамлекеттүүлүгүн түптөөгө алгачкылардан болуп салым кошкон, Кокон хандыгында жогорку "датка" наамына ээ болгон, таасирдүү саясий ишмер. Ал кыргыздардын мамлекеттик көз карандысыздыгын камсыз кылуу, биримдигин чыңдоо багытында чоң аракеттерди жасаган.
Иш-чаранын алкагында улуттук боз үйлөр тигилип, кол өнөрчүлүк жана сүрөт көргөзмөлөрү уюштурулду. Алымбек датканын эмгектерин чагылдырган сахналык эпизоддор көрсөтүлүп, концерттик программа тартууланды.
Мааракеге арналган иш-чаралар жыл ичинде Алай районунда жана Ош шаарында улантылат.
