Бишкек, 07.02.25. /Кабар/. Ош шаарында жаңы көпүрөлөр курулат. Бул тууралуу муниципалитеттен билдиришти.
Бүгүн Ош регионалдык шаар куруу жана архитектура башкармалыгы тарабынан Ж.Бабараимов көчөсүндө мыйзамсыз жана убактылуу жайгашкан соода-сатык жайлардын ээлерине курулуштарды бузуу боюнча эскертүүлөр берилип, түшүндүрүү иштери жүргүзүлдү.
Бул жерде жол Ош шаарынын мэри Жеңишбек Токторбаевдин көчмө жыйынында берилген тапшырмасына ылайык, унаа тыгынын жоюу жана шаардын жалпы көрүнүшүн жакшыртуу максатында 6 катар унаа бата турган болуп кеңейтилет.
Жумуштардын алкагында, Ж.Бабараимов көчөсүнөн (Вещевой рынок) Мамажан көчөсүнө чейин (Шейит-Дөбө мечити) жана Т.Турсунбаева көчөсүнөн («Зухра» рестораны) Ж.Бабараимов көчөсүн карай эстакадалык көпүрөлөрдү куруу боюнча долбоорлорду ишке ашыруу каралган.
