Бишкек, 25.09.26. /Кабар/. Ош электр тармактарында 2027-жылга карата электр инфраструктурасын жаңылоого багытталган жаңы долбоордун үстүндө иш алып баруу маселелери талкууланды. Бул тууралуу "Кыргызстан улуттук электр тармагы" ААКтын башкы директору Илгиз Сыдыгалиевдин иш сапарынын алкагында өткөн жумушчу жыйында сөз болду.
Ишканадан билдиришкендей, ага Ош электр тармактарынын жетекчилиги жана райондук электр тармактарынын башчылары катышты.
Жыйында 2027-жылга мерчемделген иштерде эски ыкмалардан баш тартып, заманбап жана натыйжалуу технологияларды колдонуу, мөөнөтү аяктаган электр объектилерин этап-этабы менен жаңылоо маселелери каралды.
Ошондой эле каражаттарды натыйжалуу пайдалануу жана электр менен камсыздоонун ишенимдүүлүгүн жогорулатуу боюнча сунуштарды иштеп чыгуу белгиленди. Буга чейин Ош облусун "акылдуу" электр эсептегичтер менен толук камсыз кылуу пландалганы айтылган.
