Бишкек, 30.07.26. /Кабар/. Ош облустар аралык бириккен клиникалык ооруканасына 11,5 млн долларлык жабдык берилет. Бул тууралуу бүгүн президенттин Ош облусундагы өкүлү Аманкан Кенжебаев ооруканага барган учурда айтты.
Өкүлчүлүктүн маалыматына караганда, ооруканага Жогорку Кеңештин Ала-Тоо депутаттык тобунун башчысы Таалайбек Масабиров жана депутаттар дагы барышты.
Анда Япониянын JICA өнүктүрүү агенттиги тарабынан гранттык негизде бериле турган медициналык жабдууларды жайгаштыруу маселеси талкууланды. Анын ичинде ангиограф жана компьютердик томограф аппараттары үчүн кошумча имарат куруу пландалды.
Ошондой эле ыйгарым укуктуу өкүл жана депутаттар оорукананын капиталдык оңдоодон өткөн бөлүмдөрү менен таанышып, эмгек жамаат менен жолугушуу өткөрүштү.
Маалымат үчүн: JICA тарабынан Ош облустар аралык бириккен клиникалык ооруканасына 31 түрдүү 130 медициналык жабдык берилет. Жабдуулардын жалпы сметалык баасы 11,5 млн долларды түзөт.
