Бишкек, 20.05.25 /Кабар/. Ош – Баткен – Раззаков унаа жолунун 47-чакырымынан 75-чакырымына чейинки тилкесинде жол оңдоо иштери кызуу жүрүүдө.
Транспорт жана коммуникациялар министрлигинен билдиришкендей, азыркы тапта 62-66-чакырымдар аралыгында асфальт төшөө, ал эми 47-чакырымында эски асфальт катмарын сыйруу менен жолду кеңейтүү жумуштары аткарылып жатат. Иш ыргагы сапатына өзгөчө басым жасоо менен бекитилген графикке ылайык уланууда.
Эске салсак, буга чейин Ош-Баткен-Раззаков унаа жолунун 28-47-чакырымдар аралыктары асфальтталган. Ошону менен бирге жолдун 63 (Абшыр-Сай), 43 (Чили-Сай) жана 29-чакырымындагы (Кыркол-Сай) көпүрөлөрдүн курулуш иштери жыйынтыкталып, колдонууга берилген.
Белгилей кетсек, Ош-Баткен-Раззаков унаа жолунун 0-75-чакырымдар аралыгы Ош облусунун аймагында жайгашкан. Анын ичинен 0-6-чакырымы Ош шаары, 6-11-чакырымы Кара-Суу району, 11-75-чакырымы Ноокат району (38-41-чакырымы Ноокат шаары) аркылуу өтөт.
