Бишкек, 05.08.26. /Кабар/. Орто-Токой ГЭСинин курулуш долбоорунун алкагында 110 кВ ачык бөлүштүрүүчү түзмөк менен 110 кВ аба электр чубалгысынын курулушу аяктады. Бул тууралуу "Чакан ГЭС" ААК билдирди.
Маалыматка ылайык, объектте кубаттуулугу 25 миң кВА болгон күч трансформатору да орнотулду. Бул өндүрүлгөн электр энергиясын өлкөнүн бирдиктүү энергетикалык тутумуна ишенимдүү өткөрүп берүүгө шарт түзөт.
Учурда долбоордун кийинки этабынын алкагында Орто-Токой ГЭСин "Кыргызстан улуттук электр тармагы" ААКтын тармагына кошуу боюнча даярдык иштери жүргүзүлүүдө.
