Бишкек, 01.04.25. /Кабар/. Ноокен районунун Кара-Булак айылында 300 гектар жер аянтына мисте жана бадам көчөттөрү отургузулууда. Бул тууралуу президенттин Жалал-Абад облусундагы өкүлчүлүгүнөн билдиришти.
Бүгүн аталган жайга министрлер кабинетинин төрагасынын орун басары – УКМК төрагасы Камчыбек Ташиев, президенттин өкүлү Тилек Текебаев, өзгөчө кырдаалдар министри Бообек Ажикеев, жергиликтүү бийлик, ӨКМ жана токой чарба кызматкерлери барып, көчөт тигүү өнөктүгүнө катышты.
Буга чейин Кара-Булак айылында токой аянттарын көбөйтүү максатында 300 гектар жер аянты тосмолонгон. Анын 150 гектарына мисте, 150 гектар жер аянтына бадам көчөттөрү тигилүүдө. Көчөттөр болжол менен 15-20 жылда түшүмгө келет. Үрөндөр Кочкор-Ата жана Тоскоол-Ата токой чарбасында өстүрүлгөн.
Тармактын кызматкерлери УКМК төрагасы Камчыбек Ташиевге токой чарба адистиринин жетишсиздик көйгөйү бар экенин айтышып, жаш кадрларды даярдоо муктаждыгы жаралганын белгилешти.
УКМК төрагасы Кыргызстан тоолуу өлкө болгондуктан, жергиликтүү тургундардын негизги киреше бөлүгү болгон токой аянттарын сактоо жана кеңейтүү үчүн тармак боюнча билим алган, кесипкөй адистердин орду чоң экенин айтты. Ал жаш кадрларды чет өлкөдө эмес, мамлекеттин өзүндө даярдоо боюнча тийиштүү чаралар көрүлөөрүн кошумчалады.
