Бишкек, 14.03.25. /Кабар/. Ноокен районунун Д.Садырбаев айыл аймагы №27 “Бирдик” жалпы билим берүүчү орто мектебинин курулушу жүрүүдө. Бул тууралуу президенттин аймактагы өкүлчүлүгүнөн билдиришти.
Аталган билим берүү мекемесинин имараты 1969-жылы курулуп, эскилиги жеткендиктен Өзгөчө кырдаалдар министрлиги тарабынан пайдаланууга жараксыз объектилердин каратына кирген.
Муктаждыкты чечүү максатында 2022-жылы республикалык бюджеттен 94 млн 438 миң сомдон ашуун акча каражаты бөлүнүп, 275 орундуу жаңы, заманбап мектептин курулушу башталган.
Азыркы учурда имараттын чатыры жабылып, айнек-терезелери коюлган. Ага катар ички жана тышкы курулуш жумуштары уланууда.
Билим берүү мекемеси ушул жылдын 31-августта Эгемендүүлүк майрамынын алкагында Жалал-Абад облусунда колдонууга берилүүчү 34 объекттин тизмесине кошулган.
