Бишкек, 11.08.26. /Кабар/. Ноокат райондук электр тармактарында электр энергиясын керектөө көрсөткүчтөрүн жасалмалоо фактысы аныкталды.
Башкы прокуратурадан билдиришкендей, Ош облусунун прокуратурасы тарабынан текшерүү жүргүзүлгөн. Анда ишкананын кызмат адамдары 2025-жылы райондогу сегиз айыл өкмөтүнө караштуу бюджеттик мекемелердин электр энергиясын керектөө көрсөткүчтөрүн бурмалап, мыйзамсыз актыларды түзүшкөнү аныкталган.
Документтерге иш жүзүндө пайдаланылбаган 1 млн 218 миң 365 кВт/саат электр энергиясы киргизилип, мамлекетке 4 млн 826 миң 127 сом зыян келтирилген.
Бул факты боюнча "Кызмат абалынан кыянаттык менен пайдалануу" беренеси менен кылмыш иши козголуп, учурда тергөө иштери жүрүүдө.
