Бишкек, 09.09.25. /Кабар/. Непалдын премьер-министри Шарма Оли массалык баш аламандыктардан улам кызматтан кеткенин РИА Новости India Today агенттигине шилтеме берүү менен билдирди.
Ал бул кызматты 2024-жылдын 15-июлунан бери аркалап келген. ЖМКлардын маалыматына караганда, оппозициялык Улуттук-демократиялык партиянын бардык мүчөлөрү андан үлгү алышкан.
Шейшембиде демонстранттар Катмандудагы өкмөттүк комплекске киришти. Алар парламенттин имаратын, башкаруучу Непал конгресси партиясынын борбордук кеңсесин жана өкмөт башчынын резиденциясын өрттөштү.
Непал армиясы тик учактар менен министрлерди резиденцияларынан эвакуациялоодо. Катмандудагы эл аралык аэропорт жабылып, бардык каттамдар токтотулду.
Демонстранттар Катмандудагы Хилтон мейманканасына да киришти, мейманкананын үстүндө түтүн көрүнүп турат.
Похара шаарындагы туристтик аймакта абал тынч бойдон калууда, деп билдирди РИА Новостиге ал жерде жашаган россиялык аял. Эс алуучуларды коопсуз жерлерде болууга, нааразылык акциялары өтүүчү аймактардан оолак болууга жана өкмөттүн көрсөтмөлөрүн аткарууга чакырылды.
Башаламандык эмнеден чыкты?
Өткөн аптада өкмөт Байланыш жана маалымат технологиялар министрлигинен каттоодон өтпөгөн социалдык тармактарга тыюу салган. Аларга Meta, Alphabet (YouTube), X, Reddit жана LinkedIn кирген.
Парламенттеги негизги оппозициялык күч болгон Непалдын Коммунисттик партиясынын улук партиялык уюштуруучусу Хит Радж Пандей бул чечимди акылга сыйгыс деп атап, социалдык медианы жабуу башаламандыкка алып келиши мүмкүн экенин эскерткен.
8-сентябрда Катмандуда, андан соң башка шаарларда негизинен жаштардын катышуусунда массалык нааразылык акциялары башталган. Маалымат каражаттары муну “Z муунунун революциясы” деп аташкан. Полиция менен кагылышта 19 демонстрант набыт болуп, 500дөн ашууну жарадар болгон.
Шейшембиде Непал өкмөтү социалдык медиага тыюуну алып салды.
Өкмөт 15 күндүн ичинде баш аламандыкка алып келген окуялардын анализин жана жаңы нааразылык акцияларынын алдын алуу боюнча сунуштарды берген атайын комитет түзөт.
