Бишкек, 14.06.26. /Кабар/. Министрлер кабинетинин төрагасынын биринчи орун басары Данияр Амангелдиев металл конструкцияларды өндүрүү боюнча жаңы заманбап заводдун курулушунун башталышын белгилеген биринчи колоннаны орнотуу салтанаттуу аземине катышты.
Иш-чаранын катышуучулары алдында сүйлөп жатып, министрлер кабинетинин төрагасынын биринчи орун басары долбоордун командасын жана өнөктөштөрүн курулуштун башталышы менен куттуктап, жаңы жогорку технологиялык ишкананын ишке киргизилиши улуттук экономиканын жана өнөр жай секторунун ишенимдүү жана туруктуу өсүшү шартында өтүп жаткандыгын баса белгиледи.
"Алдын ала баалоо боюнча, 2025-жылдын жыйынтыгы боюнча Кыргызстандын ИДПсы 11,1%га көбөйүп, 1 триллион 976 миллиард сомду түздү. Өнөр жай продукциясынын көлөмү дээрлик 800 миллиард сомго жетип, 10,6%га өскөнүн көрсөттү. Ошол эле учурда кайра иштетүү өнөр жайынын үлүшү дээрлик 80% түзгөн. Учурдагы жылы да оң динамика сакталууда: 2026-жылдын январь-апрелинде өнөр жай өндүрүшүнүн көлөмү болжол менен 299 миллиард сомду түзүп, 14,7%га көбөйдү (алтынды эсепке албаганда - 17,9%га). Курулуш сектору рекорддук темптерди көрсөтүп жатат - курулуш материалдарынын өндүрүшү 39,3% өскөн, бул металл конструкцияларга туруктуу ички суроо-талапты түзүүдө", - деп билдирди Данияр Амангелдиев.
Белгилей кетсек, жаңы DSKA заводу заманбап автоматташтырылган өндүрүштүк линиялар менен жабдылат. Ишкананын долбоордук кубаттуулугу жылына 12 миң тоннадан ашык металл конструкцияларды түзөт, бул ата мекендик курулуш индустриясынын атаандаштыкка жөндөмдүүлүгүн бекемдөөгө жана импортко көз карандылыгын азайтууга мүмкүндүк берет.
Министрлер кабинетинин төрагасынын биринчи орун басары Кыргызстандын экономикасынын реалдуу секторуна өз каражаттарын активдүү инвестициялоо үчүн ата мекендик бизнеске ыраазычылык билдирди.
"Бүгүнкү биринчи колоннаны орнотуу аземи жаңы ишкананын курулушунун башталышын гана эмес, келечекке болгон жалпы ишенимибизди, жаратууга умтулуубузду жана ата мекендик ишкерлердин Кыргыз Республикасынын өнөр жай калканын жана экономикалык потенциалын чыңдоого кошкон реалдуу салымын чагылдырат", — деп баса белгиледи ал.
Сөзүнүн аягында Данияр Амангелдиев компаниянын жетекчилигине жана эмгек жамаатына алдыга коюлган пландарды ийгиликтүү ишке ашырууну, курулуш иштерин өз убагында бүтүрүүнү каалап, жаңы өндүрүш өлкөнүн инфраструктурасын өнүктүрүү үчүн ишенимдүү таяныч болоруна ишенимин билдирди.
