Бишкек, 15.07.26 /Кабар/. Нарын облусундагы эт базарларында жана мал союучу жайларда ветеринардык-санитардык талаптардын аткарылышына кылдат мониторинг жүргүзүлдү. Бул тууралуу Суу ресурстары, айыл чарба жана кайра иштетүү өнөр жай министрлигинен билдиришти.
Бул маанилүү текшерүү Ветеринардык жана фитосанитардык көзөмөл кызматынын борбордук аппаратынын өкүлдөрү тарабынан уюштурулуп, атайын тазалык деңгээлине, ветеринардык коштоочу документтердин өз убагында туура жүргүзүлүшүнө жана мыйзам талаптарынын так сакталышына баа берилди.
Учурда Нарын облусунун аймагында жалпысынан 8 эт базары жана 3 мал союучу жай расмий иш алып барууда. Текшерүүнүн жүрүшүндө жооптуу адистерге жана ишкерлерге ветеринардык коопсуздук талаптарын так сактоо боюнча жеринде кеңири түшүндүрүү иштери жүргүзүлүп, маанилүү практикалык сунуштар менен кеңештер берилди.
