Бишкек, 08.07.25 /Кабар/. 11-13-августта Нарын облусунда акимдер жана шаар мэрлери үчүн аскердик коопсуздук маселелери боюнча окуу сабактары жана "Түндүк-2025" мобилизациялык машыгуусу өткөрүлөт.
Коргоо министрлигинен билдиришкендей, иш-чарага өлкөнүн бардык аймактарынан 60тан ашык райондук администрациялардын жетекчилери жана шаар мэрлери катышып, аймактык коргонуу, мобилизациялык даярдык жана өзгөчө кырдаалдардагы аракеттер боюнча теориялык жана практикалык сабактар уюштурулат.
Ошол эле күндөрү өтө турган "Түндүк-2025" аталышындагы мобилизациялык машыгуусуна аскер комиссариаттары тарабынан чакырылган резервдеги аскер кызматчылары катышып, алар үчүн теориялык сабактар жана ок атуу менен коштолгон практикалык машыгуулар уюштурулат.
Бул иш-чаралар Коргоо министрлигинин күжүрмөн даярдык планынын негизинде өткөрүлүп, өлкөнүн коргонуу жөндөмдүүлүгүн бекемдөөгө багытталган.
