Бишкек, 08.05.26. /Кабар/. Нарын облустук ички иштер башкармалыгынын башчысы Улуу Ата Мекендик согуштун ардагери Сатынды Жапаровду Улуу Жеңиштин 81 жылдыгы менен куттуктады. Бул тууралуу облустук милициядан билдиришти.
Маалыматка ылайык, анда ардагерге майрамдык белектер жана акчалай сыйлык тапшырылды.
Белгиленгендей, Сатынды Жапаров 1926-жылы Ат-Башы районуна караштуу Ак-Муз айылында төрөлгөн. 1944-жылы 18 жашында Советтик Армиянын катарына чакырылып, Алматы шаарындагы №32 аткычтар дивизиясында кызмат өтөгөн. Согуш жылдарында Ленинград шаарын бошотуу операциясына катышкан.
1945-жылы салгылашуу учурунда жаракат алып, аскердик госпиталда дарылангандан кийин туулган жерине кайтып келген. Андан соң эмгек жолун улантып, 1948-жылы Фрунзе шаарындагы эт жана сүт азыктарын кайра иштетүү боюнча окуу жайын аяктаган.
