Бишкек, 29.01.28. /Кабар/. Нарын шаарынын борбордук базарында фермерлердин этин ортомчусуз сатуу үчүн муниципалдык эт дүкөнү уюштурулду. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Муниципалдык эт дүкөнүндө калкка сапаттуу жана коопсуз эт азыктары түздөн-түз өндүрүүчүлөрдөн сунушталып, базар баасынан төмөн жана жеткиликтүү баада сатылууда.
Бул чара калктын социалдык жактан аярлуу катмарынын азык-түлүккө жеткиликтүүлүгүн камсыздоого жана эт рыногундагы баанын негизсиз өсүшүнө жол бербөөгө багытталган.
Иш-чаранын алкагында жергиликтүү фермерлерге өз продукциясын түз сатууга шарт түзүлүп, ортомчуларды кыскартуу аркылуу өндүрүүчү менен керектөөчүнүн ортосундагы түз байланыш камсыздалды.
