Нарын облусун өнүктүрүү максатында буга чейин пландар иштелип чыккан. Учурда аларды жүзөгө ашыруунүн үстүндө жигердүү иштер жүрүүдө. Атап айтсак, облуста бир катар социалдык жана инфраструктуралык долбоорлор ишке ашууда.
Нарын облусун өнүктүрүүнүн артыкчылыктуу багыттарына төмөнкүлөр кирет:
- агроөнөр жай комплекси, анын ичинде кайра иштетүү өнөр жайы;
- өнөр жай, анын ичинде тоо-кен өнөр жайы;
- туризм;
- энергетика;
- чакан жана орто бизнес;
- айыл чарба потенциалын өнүктүрүү.
Күн мурун президент Садыр Жапаров Нарын шаарына болгон жумушчу сапарынын алкагында аймактын социалдык-экономикалык өнүктүрүү пландары менен таанышты. Анда президенттин Нарын облусундагы ыйгарым укуктуу өкүлү Нурбек Сатаров жаңы төрөт үйүнүн, шаардык үй-бүлөлүк медицина борборунун курулушунун башталышы, ошондой эле Торугарт көмүр кенин иштетүүнү камтыган инвестициялык долбоорлордун ишке ашырылышы жана башкалар жөнүндө айтып берди. Ошондой эле Ат-Башы – Баетов – Казарман жолун куруу пландары тууралуу да маалымдады.
Өз кезегинде мамлекет башчысы Жаман-Даван жана Терек-Сай суу сактагычтарынын жана каналдарынын курулушун, Баетов айылындагы борбордук парктын реконструкциясын аяктоону, Ак-Талаа районунда Коомдук маданий борборду курууга киришүүнү тапшырды. Садыр Жапаров белгиленген долбоорлорду жүзөгө ашырууга бөлүнгөн каражаттарды максаттуу пайдаланууну камсыз кылуу тапшырмасын берди.
Бүгүнкү күндө Нарын шаарын өнүктүрүүгө жана шаардыктардын жашоо сапатын жакшыртууга багытталган бир катар социалдык жана инфраструктуралык долбоорлордун катарында Мамлекеттик ипотекалык компания тарабынан салынып жаткан көп кабаттуу үйлөрдүн курулушу да бар. Долбоордо 216 батирден турган тогуз кабаттуу төрт блоктун курулушу каралган, ошондой эле унаа токтотуучу жай, балдар аянтчасы жана спорттук воркаут-зонасы курулат. Эми региондун жашоочулары үчүн батирлердин саны дагы көбөйтүлмөкчү.
Ошондой эле шаарда инновациялык-креативдик борбордун курулушу жүрүүдө. Борбор китепкана, музей, инновациялык теле жана аудиостудияларды, киноконцерттик залды, коворкинг жана IT-зоналарды, соода аянтын бириктирет. Мындан тышкары, балдардын көңүл ачуу борбору жана муниципалдык мончо да курулууда.
Учурда Нарын шаарында жол оңдоо иштери жүрүүдө. Узундугу 9 чакырымдан ашкан Ленин көчөсүнө асфальт төшөө башталды, ал эми Шералиев көчөсүндө (2,3 км) тротуарларды куруудагы мурдагы кемчиликтерди жоюу, бордюрларды жана суу агуучу лотокторду орнотуу иштери жүрүп жатат.
Мындан тышкары, УКМКнын Чек ара кызматынын Тайлак баатыр атындагы Нарын облусу боюнча башкармалыгынын 12,11 гектар жер тилкеси курулуштары менен кошо Нарын шаарынын мэриясынын муниципалдык менчигине өткөрүлүп берилген. Бошотулган жер тилкелерине турак жай, бала бакчаларды жана саламаттык сактоо объектилерин куруу пландалууда.
Министрлер кабинетинин төрагасынын орун басары – УКМК төрагасы Камчыбек Ташиев Кочкор районуна болгон иш сапарында билдиргендей, райондун инфратүзүмүн жакшыртууга 900 млн сом бөлүнөт. Бул каражатка төрт ири обьектте курулуш иштери жүрө турган болду. Алардын катарында Кочкор райондук жалпы дарыгерлердин практикалык борборунун имараты бар. Эми аталган жайдын имаратын жаңылоо үчүн төрт кабаттан турган эки имарат жана дарыгерлер үчүн атайын жатакана салынат. Бул үчүн 500 млн сом бөлүнөт.
Мындан тышкары, Ормон хан стадионуна кошумча шарт түзүү үчүн 100 млн сом, ушул эле айылдагы 5 гектар сейил бакты толук реконструкциялоого 100 млн сом каралат.
Ал эми Кочкор райондук спорт мектебинин имараты заманбап спорт комплекси болуп жаңы курулат. Бул үчүн 200 млн сом пайдаланылат.
