Бишкек, 18.06.26. /Кабар/. "Нарын шаарында таза суу менен камсыздоо жана канализация системасын реабилитациялоо" долбоорунун II фазасынын алкагында жаңы саркынды суу тазалоо жайынын курулушу башталды.
Муниципалитеттен билдиришкендей, шаардагы 20 миң адамга эсептелген заманбап үлгүдөгү суу тазалоо жайы саркынды сууну 3 этаптык: механикалык, биологиялык жана химиялык тазалоодон өткөрөт.
Aталган долбоордун II фазасынын алкагында Нарын шаарынын Чыгыш аймагына 6, Батыш аймагына 6 жалпы 12 чакырым канализация тутуму тартылды.
"Бул ири экологиялык долбоор Нарын дарыясынын тазалыгын сактоого, шаардагы санитардык абалды жакшыртууга жана калктын коопсуз жашоосуна шарт түзөт", - деп айтылат маалыматта.
Белгилей кетсек, шаардагы мурдагы саркынды суу тазалоо жайы 60 жыл мурда курулуп, эскилиги жеткен.
Иш-чарага министрлер кабинетинин төрагасынын орун басары Эрлист Акунбеков, Нарын облусу менен шаарынын башчылары, ошондой эле Швейцариянын, Европа биримдигинин элчилери жана Европалык реконструкциялоо жана өнүктүрүү банкынын өкүлдөрү катышты.
