Бишкек, 18.09.25. /Кабар/. Нарын шаарына коомдук унааларды, күйүүчү май менен жүрүүчү 11 автобус жана чарба мекемелерине атайын техникаларды сатып алуу боюнча президенттин тескемесине ылайык, заводдор менен келишимдер түзүлдү.
Шаардык мэриядан билдиришкендей, автобустарды сатып алуу боюнча кытайлык “Ютонг” заводу менен түзүлгөн келишимге ылайык, аталган компания 30 орундуу, күйүүчү май менен жүрүүчү, мүмкүнчүлүгү чектелген жарандар үчүн атайын орундар жана башка заманбап шарттары бар акыркы үлгүдөгү автобустарды 65 күндүн ичинде алып келип берүү милдетин алган.
Нарын шаарынын мэри Жайнак Немат уулу “Ютонг” кытай автоунаа заводунун Кыргызстандагы өкүлү Сам Джангды кабыл алып, өндүрүштөгү автобустардын өзгөчөлүктөрү тууралуу маалымат алды. Сүйлөшүү учурунда шаар башчысы элди сапаттуу коомдук транспорт менен камсыздоо маселесинин маанилүүлүгүн белгилеп, автобус сатып алуу боюнча талаптарды кеңири түшүндүрдү.
Буга чейин атайын тескемеге ылайык, автобустарды өндүргөн заводдордон түз сатып алуу иштери уюштурулуп, беш чет элдик ишкана менен кызматташуу жүрүүдө.
Белгилей кетсек, президенттин Турукташтыруу фондунан Нарын шаарын өнүктүрүү максатында бөлүнгөн 807 миллион сомдун эсебинен 130 миллион сом коомдук унааларды сатып алууга каралган.
