Бишкек, 12.05.26. /Кабар/. Президенттин Нарын облусундагы өкүлү Нурбек Сатаровдун аймак тургундары менен жолугушуулары Ак-Талаа районунда уланууда. Бул тууралуу өкүлчүлүктөн билдиришти.
Бүгүн облус башчысы Ала-Буга, Кара-Бүргөн жана Баетов айыл аймактарынын жашоочуларынын көйгөйлөрүн жана суроо-талаптарын угат.
Жолугушуу Ала-Буга айыл өкмөтүнүн Чолок-Кайың айылында башталып, ага Кош-Дөбө, Конорчок, Чолок-Кайың жана Жерге-Тал айылдарынын тургундары катышты.
Нурбек Сатаров Ак-Талаа районунун 90 жылдыгына карата бир катар объектилердин ачылышы пландалып жатканын жана районго өзгөчө көңүл бурулуп жатканын белгиледи.
"Учурда жол маселелери чечилип, республикалык бюджеттин эсебинен социалдык объектилер курулуп, пайдаланууга берилүүдө", - деди ал.
Облус башчыларынын жана шаар мэрлеринин эл менен жолугушуулар президент Садыр Жапаровдун тапшырмасы менен уюштурулуп, УТРК жана ЭлТР телеканалдары аркылуу түз эфирде көрсөтүлүүдө.
Белгилей кетсек, облус башчысы саат 13:30да Кара-Бүргөн, ал эми 16:00дө Баетов айыл өкмөттөрүнүн жашоочулары менен жолугат.
