Бишкек, 08.01.26. /Кабар/. Бүгүн Жол кыймылынын коопсуздугун камсыздоо башкы башкармалыгынын жетекчиси Азенбек Козукеев Нарын облусундагы жол кыймылынын коопсуздугун камсыздоо бөлүмүнүн тескөөчүлөрүнүн жумушун таң эртеден баштап текшерди.
Ведомствонун маалыматына караганда, Азенбек Козукеев кызматтык унааларды жолго чыгарып, жол унаа кырсыктарынын алдын алуу боюнча профилактика иштерин күчөтүүнү тапшырды.
Айдоочуларды жолдо бири-бирин сыйлап, маданияттуулукка чакыруу, жол тайгак мезгилде эскертүү маалыматтарын берүү, Бишкек - Нарын - Торугарт жолундагы чет өлкөлүк айдоочуларга түшүндүрүү иштерин жүргүзүү зарылдыгын белгиледи.
Жыйынтыгында башкармалыктын облус боюнча башчысы Нурбек Салымбаевге кемчиликтерди тез арада жоюп, багыттуу иш алып баруу тапшырылды.
