Бишкек, 18.08.26. /Кабар/. Бүгүн Нарын облусунун башчысынын биринчи орун басары Эркинбек Чекирбаев райондордун акимдеринин биринчи орун басарлары жана Инвестициялар боюнча улуттук агенттиктин өкүлдөрү менен жолугушту.
Президенттин аталган облустагы өкүлчүлүгүнөн билдиришкендей, жолугушууда аймактагы инвестициялык долбоорлордун ишке ашырылышы, өздөштүрүлгөн инвестициялардын көлөмү, долбоорлордун учурдагы абалы жана аларды ишке ашырууда жаралган көйгөйлүү маселелер талкууланды.
Ошондой эле инвестициялык долбоорлорду илгерилетүү жана жергиликтүү деңгээлдеги колдоону күчөтүү боюнча пикирлер айтылды.
Иш-чарага Мамлекеттик-жеке өнөктөштүк борборунун улук эксперти Ыйман Рахатбеков, Инвестициялар боюнча улуттук агенттигинин сектор башчысы Нурбол Тынайбеков жана Мамлекеттик-жеке өнөктөштүк борборунун улук эксперти Улан Данилбеков катышты.
