Бишкек, 30.03.26. /Кабар/. Нарын облусундагы Нарын — Баетов жана Баетов — Макмал унаа жолдорун реконструкциялоо иштеринин алгачкы этабы башталды.
Транспорт министрлигинен билдиришкендей, учурда тиешелүү тилкелерде даярдык көрүлүп, техникалык изилдөөлөр жүрүүдө.
Министрдин орун басары Улукбек Жанибеков Нарын облусуна болгон иш сапарынын алкагында курулуш жүрө турган аймактарды жеринде кыдырып чыкты.
Текшерүү төмөнкү тилкелерди камтыды:
- Нарын — Баетов жолу: 5-чакырымдан 120-чакырымга чейин;
- Баетов — Макмал жолу: 0-чакырымдан 30-чакырымга чейин.
Учурда объекттерде төмөнкү иштер активдүү жүрүүдө:
- Жердин түзүлүшүн так аныктоо үчүн топосьёмка иштери.
- Курулуш материалдарын үзгүлтүксүз камсыздоо максатында атайын карьерлерди иштетүүгө камылга көрүлүүдө.
- Керектүү техникаларды жана жумушчу күчүн топтоо.
Министрдин орун басары Улукбек Жанибеков подрядчы уюмдарга курулуштун сапатын катуу көзөмөлгө алууну тапшырды.
"Ар бир жумуш бекитилген долбоордук документтерге ылайык, так жана сапаттуу аткарылышы керек. Биз жолдун узак мөөнөткө чыдамдуу болушун камсыздоого милдеттүүбүз", — деп белгиледи ал.
