Бишкек, 25.04.25./Кабар/. Кыргыз Республикасынын Россиядагы элчилигинин демилгеси менен Москва шаарындагы мектептердин биринде Улуу Ата Мекендик согуштагы Жеңиштин 80 жылдыгына арналган салтанаттуу иш-чара болуп өттү.
КР ТИМден билдиришкендей, иш-чаранын алкагында кыргыз жана орус тилдеринде жарык көргөн “Легендарлуу генерал жана кыргызстандык панфиловчу баатырларды эскерүү” аттуу китептин бет ачары өткөрүлдү. Китепти чыгарууну демилгелеген топтун өкүлү Замир Асаналиев, мектеп директору Белла Руденко, панфиловчу ардагерлердин өкүлү З.П. Грязнова, генерал И.В. Панфиловдун небереси жана чөбөрөсү Е.Г. Козырькова менен М.А. Козлова, мугалимдер, окуучулар жана кыргыз диаспорасынын өкүлдөрү катышты.
Элчиликтин өкүлү өзүнүн куттуктоо сөзүндө Кыргызстандын Улуу Жеңишке кошкон салымын баса белгилеп, элдин эрдигин унутпоо зарылдыгын эске салды.
Катышуучулар генерал-майор И.В. Панфилов жетектеген, Москва үчүн болгон салгылашта өзгөчө эрдик көрсөткөн 316-аткычтар дивизиясынын баатырдыгын белгилешти. Ошондой эле генерал Панфиловдун кызы М.И. Панфилова тарабынан негизделген, мектептин базасында жайгашкан аскердик-тарыхый музей менен таанышып, окуучулар тарабынан даярдалган поэтикалык композицияны көрүштү.
Иш-чаранын жүрүшүндө Кыргызстандын маданиятын да таанытуу максатында улуттук кол өнөрчүлүк буюмдары, табияты жана белгилүү инсандары тууралуу фотокөргөзмө уюштурулду.
