Бишкек, 24.07.26 /Кабар/. Министрлер кабинетинин төрагасы Адылбек Касымалиев Таласта бир катар социалдык объектилердин курулуш иштеринин жүрүшү менен таанышты.
Минкаб төрагасы Ж. Баласагын атындагы Кыргыз улуттук университетинин Талас аймактык көп тармактуу институтунун жаңы имаратынын, Талас шаарындагы 5311 орундуу стадиондун жана “Акылман” президенттик лицейинин курулушун, ошондой эле К. Нуржанов атындагы аллеясын реконструкциялоо иштерин карап чыкты.
Аталган объекттердин курулушун ушул жылдын август айында аяктоо пландалууда. Бул социалдык объекттердин ачылышы өлкөнүн Эгемендүүлүк күнүнө туш келет деп күтүлүүдө.
Министрлер кабинетинин төрагасы тиешелүү мекемелердин жетекчилерине социалдык объекттердин курулушун сапат талаптарына жана заманбап стандарттарга ылайык келтирүү менен, белгиленген мөөнөттө аяктоону тапшырды.
