Бишкек, 14.09.26 /Кабар/. Жогорку Кеңештин депутаттары бир катар мектеп жана бала бакча жетекчилери, ошондой эле Агартуу министрлигинин өкүлдөрү менен билим берүү тармагындагы көйгөйлөрдү жана аларды чечүү жолдорун талкуулады. Бул тууралуу Жогорку Кеңештен билдиришти.
Жолугушууда мамлекеттик жана жеке билим берүү уюмдары үчүн бирдей жана ыңгайлуу шарттарды түзүү, билим берүү тармагындагы мыйзамдарды учурдагы талаптарга ылайыкташтыруу маселелери көтөрүлдү.
Үй-бүлөлүк типтеги бала бакчалардын жетекчилери балдарды кабыл алуудагы чекти 25тен 50гө чейин көбөйтүүнү сунушташты. Алар белгиленген чектен улам айрым бала бакчалар ишин токтотууга аргасыз болуп жатканын билдиришти.
Ошондой эле жеке мектептердин жана бала бакчалардын өкүлдөрү электр энергиясына болгон тарифтерди кайра карап чыгып, аларды коммерциялык эмес, социалдык керектөөчүлөрдүн категориясына өткөрүүнү сунушташты. Мындан тышкары, сууну керектөөнүн 80 куб метрлик лимитин көбөйтүү сунушталды.
Жолугушууда ошондой эле жеке мектепке чейинки билим берүү уюмдарынын кызматкерлеринин квалификациясын жогорулатуу, алардын ишмердигин салыктык жөнгө салуу маселелери да талкууланды. Ошондой эле кызматкерлердин сыйлыктары, жетишкендиктери жана кесиптик натыйжалары көрсөтүлө турган санариптик эмгек китепчесин киргизүү сунушу айтылды.
