Бишкек, 13.05.26. /Кабар/. Күн мурун Кыргыз улуттук "Манас" театрында президенттин "Улуттук дем - дүйнөлүк бийиктик" уңгужолу жөнүндө жарлыгын ишке ашыруу максатында маданий иш-чара өттү.
Маданият, маалымат жана жаштар саясаты министрлигинен билдиришкендей, иш-чара "Аруу Нур" коомдук фонду тарабынан уюштурулуп, ага мамлекеттик катчы Арслан Койчиев, окумуштуулар, маданият өкүлдөрү, коомдук ишмерлер жана шаар тургундары катышты.
Иш-чаранын алкагында кыргыз элинин каада-салты, улуттук баалуулуктары жана кол өнөрчүлүгү даңазаланып, көрүүчүлөргө "Манас" эпосунан үзүндүлөрдү камтыган театралдаштырылган спектакль тартууланды. Улуттук маданиятты жана руханий мурастарды жайылтууга багытталган программа келген коноктор тарабынан жылуу кабыл алынды.
Уюштуруучулардын айтымында, мындай иш-чаралар улуттук аң-сезимди бекемдөөгө, кыргыз элинин тарыхый жана руханий мурастарын жаш муундарга жеткирүүгө өбөлгө түзөт.
