Бишкек, 22.09.25. /Кабар/. Жогорку сотто Мамлекеттик тил күнүнө арналган иш-чара өттү. Бул туралуу ведомстводон маалымдашты.
Ага Жогорку соттун төрагасы Медербек Сатыев, төраганын орун басарлары Нургул Бакирова жана Нурлан Мусаев, ошондой эле чакырылган коноктор президентке караштуу Мамлекеттик тил жана тил саясаты боюнча улуттук комиссиянын Окуу-маалыматтык жана котормо борборунун директору Карлыгач Жумакадырова жана борбордун тренери Тамара Козубекова катышты.
“Тил – элдин жүрөгү, элдин жан-дүйнөсү. Улуу жазуучу Чыңгыз Айтматов айткандай, “Эне тилин билбеген — элдин каймак байлыгын түшүнбөйт”. Тилди сактоо — бул элдин рухий дүйнөсүн, тарыхын, маданиятын сактоо дегенди түшүндүрөт. Биздин ар бирибиздин милдетибиз — кыргыз тилин өнүктүрүү, байытуу жана жаш муунга таза, так үйрөтүү.
Мамлекеттик тил – улуттук биримдиктин негизи. Тилди өнүктүрүү – бул жалпы коомдун иши. Ар бир кыргызстандык кыргыз тилин урматтоого, үйрөнүүгө жана колдонууга тийиш. Бул – биздин ыйык парзыбыз.
Ата-бабадан калган улуу мурасыбыз, улутубузду улут кылып келе жаткан куралыбыз — бул кыргыз тили.Мамлекеттик тилибиз — өз ара түшүнүүнүн, улуттук адабияттын гана эмес, мыйзам чыгаруунун жана мамлекеттик башкаруунун тилине айланды.
Сот тутуму дагы эне тилин аздектеп, Пленумдун иши каралганда, судьялар ант бергенде, чоң жыйындар, тегерек столдор уюштурулганда, алгач Кыргыз Республикасынын гимни жаңырып, андан соң кыргыз тилинде өткөрүлөт", — деп белгиледи Медербек Сатыев.
Андан соң Жогорку соттун аппаратынын кызматкерлери үчүн «Сот адилеттиги тармагындагы иш кагаздарын жүргүзүүнүн өзгөчөлүктөрү. Орун алган көйгөйлөр» темасында кеңири лекция окулду.Тренердин чыгышынан кийин аппаратык кызматкерлер кызыктырган суроолорду берип, кеңири жооп ала алышты. Жолугушууда катышуучулар мамлекеттик тилде юридикалык терминологияны колдонуу практикасындагы актуалдуу маселелерди талкуулашты.
Ал эми Тамара Козубекова күнүмдүк иште мыйзам чыгаруучу тарабынан бекитилген кыргыз тилинде жазуу эрежелерин активдүү колдонуу, иш кагаздарын жүргүзүү маселелери боюнча Кыргыз Республикасындагы типтүү нускаманы колдонуу, ошондой эле орус-кыргыз юридикалык терминдер сөздүгүн пайдаланууну сунуштады.
