Бишкек, 13.11.25 /Кабар/. Өлкөгө алып келинген ар бир дары-дармек тиешелүү текшерүүдөн өткөрүлүп, бардык талаптарга жооп бергенден кийин гана таратылат. Бул тууралуу “Кыргызфармация” мамлекеттик ишканасынын директору Талант Султанов “Кабар” агенттигине берген маегинде билдирди.
Анын айтымында, дары-дармектин сапаты түздөн-түз жарандардын ден соолугуна таасир этет. Мындан улам катуу көзөмөл талап кылынат.
“Өлкөгө кирген ар бир дары сөзсүз текшерилет. Бул үчүн атайын түзүлгөн Дары-дармектер жана медициналык техника департаменти иш алып барат. Алар дарынын клиникалык практикада колдонулушун, сапатын, сертификаттарын жана документтерин кылдат текшеришет. Бардык талаптарга жооп бергенден кийин гана дары катталып, рынокко чыгарылат”, - деди Султанов.
Ал кошумчалагандай, бул механизм элдин саламаттыгын коргоодо негизги роль ойнойт жана дары-дармектердин коопсуздугун камсыз кылат.
