Бишкек, 19.06.25. /Кабар/. Мамлекеттик салык кызматы менен коммерциялык банктардын өкүлдөрүнүн жолугуп, салыктарды QR-код жана төлөм коду аркылуу төлөөгө өтүү маселесин талкуулашты.
Жолугушууга салык кызматынын төрагасынын орун басары Мирлан Рахманов катышты.
Ведомстводон маалымдашкандай, жолугушуунун негизги темасы 2025-жылдын 1-июлунан тартып, банктардын кассалары аркылуу салыктарды, салык органдары тарабынан башкарылган салыктык эмес төлөмдөрдү жана камсыздандыруу төгүмдөрүн төлөөнү QR-код аркылуу жүргүзүү механизмине өтүү болду.
Салыктарды төлөм коду же QR-код аркылуу төлөө төмөнкүлөрдү камсыздайт:
1) Салык төлөөчүнүн төлөгөн каражаттары онлайн режиминде бюджетке түшөт;
2) Банк кассасында төлөм документтери, реквизиттерди толтурууда (кол менен толтуруу) кетчү каталар жоюлат;
3) Салык төлөөчүлөргө ыкчам жана сапаттуу кызмат көрсөтүү (банктын кассаларындагы узун кезектерди жоёт, убакытты үнөмдөйт).
Салык төлөөчү төлөм кодун же QR-кодду төмөнкү жолдор менен түзө алат:
- Салык төлөөчүнүн кабинетинде же мобилдик тиркеме аркылуу өз алдынча («Салыктарды төлөө» башкы бетинде);
- Бирдиктүү терезелерде (Ишкерлерди тейлөө борборлорунда, аймактык Салык кызматтарында).
Жолугушуунун жыйынтыгында тараптар Салык кызматы менен банк секторунун ортосундагы өз ара байланыштарды өркүндөтүү максатында кызматташууга даяр экендиктерин билдиришти.
Белгилей кетсек, аталган жаңы өзгөрүүлөр салыктарды төлөө жана бюджетке каражаттарды онлайн режиминдеги процессин жөнөкөйлөтүү, ошондой эле, салык төлөөчүлөр үчүн ыңгайлуу шарттарды түзүү максатында киргизилүүдө.
