Бишкек, 13.11.25 /Кабар/. Кыргызстанда маал-маалы менен электр энергиясын өчүрүү болбойт. Бул тууралуу министрлер кабинетинин төрагасынын орун басары - УКМК төрагасы Камчыбек Ташиев “Регион ТВ” телеканалына берген маегинде билдирди.
Анын айтымында, Токтогул суу сактагычындагы суунун деңгээли төмөн болгонуна карабастан, өлкө жылытуу мезгилин үзгүлтүксүз өткөрөт.
“Электр энергиясы жетиштүү. Бирок, биз аны үнөмдүү пайдаланууга тийишпиз. Токтогулда суу аз, өндүрүш төмөндөдү. Ошентсе да, биз бул кыштан аман-эсен чыгабыз”, - деди ал.
Ошондой эле Ташиев социалдык тармактарда тарап жаткан айрым видеолор чындыкка дал келбесин белгиледи.
“Кара ниет адамдар жарыксыз калган учурларды видеого тартып, атайлап таратып жатышат. Чындыгында бул убактылуу оңдоо иштерине байланыштуу болушу мүмкүн. Электр энергиясы өчүрүлүп жаткан жок жана системалуу өчүрүүлөр болбойт”, - деп билдирди УКМК төрагасы.
