Бишкек, 14.08.26. /Кабар/. Баткен облусунун башчысынын орун басары Абдурашит Ташбалтаев Кызыл-Кыя шаарындагы социалдык жана стратегиялык объекттердин күз-кыш мезгилине даярдыгын жеринен текшерди.
Өкүлчүлүктөн билдиришкендей, текшерүүнүн жүрүшүндө "Кызыл-Кыя жылуулук муниципалдык" ишканасы, үй-бүлөлүк дарыгерлер топторунун имараты, шаардык төрөт үйү, билим берүү мекемелеринин жылуулук берүү мезгилине даярдыгы каралды.
Текшерүүдө жылуулук системаларынын абалына, отун базаларынын даярдыгына жана социалдык объекттердин үзгүлтүксүз иштөөсүн камсыз кылууга өзгөчө көңүл бурулду.
Жыйынтыгында тиешелүү жетекчилерге аныкталган кемчиликтерди кыска мөөнөттө жоюу жана күз-кыш мезгилин үзгүлтүксүз өткөрүү боюнча тапшырмалар берилди.
